Dassedagsê 21/04/17

 
mail
Langenhoven Header web
21 April 2017
                      Dassedagsê

 

Netbal en hokkie Saterdag in aksie

 

Die meeste van die skool se netbal- en hokkiespanne is hierdie naweek teen HTS Drostdy in aksie. Die program verskyn agterop hierdie nuusbrief. Ons wens hulle baie sterkte toe met die eerste wedstryde van hierdie kwartaal.

 

 

 

Nog ‘n Langnaweek is op hande!           

 

Daar is volgende naweek weer ‘n langnaweek. Vryheidsdag val op Donderdag 27 April en Werkersdag val op Maandag 1 Mei. Alhoewel 28 April nie ‘n openbare vakansiedag is nie, is dit wel ‘n skolevakansiedag.

 

 

 

Personeelwisseling

 

Mev. Maartens, wat Wiskunde onderrig het, het die skool aan die einde van verlede kwartaal verlaat. Gelukkig kon die skool ‘n bekwame plaasvervanger in mev. Coetzee van Heidelberg vind. Mev. Grové, wat junior Afrikaans onderrig het, verlaat die skool aan die einde van April. Sy word deur mev. Steyn van Stilbaai vervang. Die twee personeellede wat Langenhoven vaarwel roep, gaan beslis ‘n leemte laat, maar ons glo die twee nuwe leerkragte gaan hulle skoene kan volstaan. Ons vertrou dat laasgenoemde leerkragte se verbintenis met die Dasse baie positief sal wees!

 

 

 

Skaak weer op dreef

 

Die skool se top skaakspelers speel hierdie naweek weer ‘n rondte Eden Skaapkproewe, hierdie keer op Mosselbaai. Ons wens hulle baie sterkte toe.

 

 

 

Rugby in aksie

 

Die eerste- en O/15-rugbyspanne was gister teen Hillcrest Sekondêr van Mosselbaai in aksie. Die eerste rugbyspan het indrukwekkend gelyk en met 36-10 gewen. Die O/15’s het egter harde bene gekou en moes die knie teen Hillcrest buig.

 

Ons rugbyspanne speel Dinsdag tuis teen Kairos Sekondêr van Heidelberg. Ons glo die Dasse sal goeie rekenskap van hulleself gee.

 

 

 

Taalbond

 

Daar is meer as 50 leerders wat eerskomende Maandag die Taalbond Tweetaligheidseksamen skryf. Dit is ‘n nasionale eksamen waarin leerders se vlak van tweetaligheid gemeet word. Die leerders skryf twee vraestelle van twee ure lank. Die leerders ontvang met hulle uitslae ‘n sertifikaat wat hulle bedrewenheid aandui. Dit is veral vir die senior leerders ‘n baie nuttige sertifikaat om te hê, veral wanneer hulle in die toekoms vir betrekkinge aansoek doen.

 

 

 

Netbal in aksie

 

Die meeste van die skool se netbalspelers was gister teen ‘n toerspan van Westerford (Kaapstad) in aksie. Ons netbalspelers het baie goeie rekenskap van hulleself gegee, veral as daar in ag geneem word dat ons derde netbalspan hulle eerstespan aangedurf het. Die derdes het net-net met 16-19 verloor. Ons vierdespan het hulle tweedespan met 13-9 geklop. Ons O/15A’s het Westerford se O/16A-span met 19-5 ore aangesit. Ons O/15B’s moes ongelukkig die knie teen hulle O/16B’s met 5-10 buig. Ons O/14B’s het hulle O/14A’s met 15-5 geklop en ons O/14C’s het met 8-16 verloor.

 

 

 

Hokkie en netbal speel proewe

 

Daar is van ons hokkiedogters wat eerskomende Maandag Eden-proewe op George speel. Ons vertrou dat dit baie goed met hulle sal gaan.

 

Daar is ‘n groot groep netbaldogters wat Dinsdagmiddag aan die Hessequa-proewe deelneem. Baie sterkte aan hulle!

 

 

 

 

 

 

Hoërskool Langenhoven – 75 jaar oud!

 

--

HS Langenhoven geborg deur RIVERSDAL TOYOTA          

--