Dassedagsê 13/04

13 April 2018

 

                      Dassedagsê

 

 

Connor presteer uitstekend!

Connor Flanigan, ‘n gr. 11 leerder, het hierdie jaar uitstekend in die T20-krieketliga presteer. Eden Hoërskole Krieket het die skool ingelig dat Connor die meeste lopies in die hele Eden-provinsie aangeteken het – voorwaar ‘n groot prestasie. Ons vertrou dat Connor in die toekoms nόg groter hoogtes met sy uitstekende kriekettalent sal behaal! 

 

Skyfskieters skiet raak

Twee van die skool se skyfskieters het die afgelope vakansie uitstekend presteer. Hulle het aan die SAARA Gauteng Ope deelgeneem. Conrad Smalberger het nie minder nie as twee goue medaljes in die O/14-ouderdomsgroep ingepalm! Johanné van der Vyver het ook baie goed presteer en ‘n bronsmedalje in die O/16-ouderdomsgroep ontvang. Baie geluk aan hierdie skuts.

 

Hokkie en netbal speel teen Drostdy

Die hokkie (seuns en dogters) en netbal speel hierdie naweek teen Drostdy op Worcester. Die busse vertrek om 04:15 van Stilbaai en om 05:00 van Riversdal. Dit is baie vroeg en leerders moet asb. verseker dat hulle betyds is. Daar sal nie vir laat leerders gewag word nie. Die program van die sportdag verskyn agterop hierdie nuusbrief.

 

Hokkieproewe

Die O/18-dogtershokkieproewe vind hierdie naweek op Knysna (Oakhill se astro-baan) plaas. Sewe leerders is in aksie. Baie sterkte aan almal van hulle.

 

Toneeltalent

Keith Bergstedt en Angelo Bergh het na die eindrondte van die Kyknet Nasionale Toneelkompetisie deurgedring. Hulle is twee van slegs 60 leerders, uit meer as 600 vanoor die hele land, wat aan die eindrondte deelneem. Dit is voorwaar ‘n uitstekende prestasie!

 

Skaakspelers weer in aksie

Die skaakspelers is weer hierdie naweek in aksie. Hulle neem môre op Mosselbaai deel. Baie sterkte aan hulle.

 

Senior- en Junior Bal

Die Senior Bal vind eerskomende Woensdag plaas en die Junior Bal vind Donderdagaand plaas. Ons vertrou dat dit ‘n heerlike geleentheid vir ons leerders sal wees. Baie dankie aan alle ouers en personeel wat hierdie aand vir ons leerders moontlik maak.

Taalbond-eksamen

Die landswye Taalbond Tweetaligheidseksamen vind eerskomende Maandag in skooltyd plaas. Daar is 37 leerders wat daaraan deelneem. Dit is ‘n geleenheid om ‘n nasionale sertifikaat te bekom wat ‘n bewys is van die leerder se tweetaligheid. Baie sterkte aan hierdie leerders.

 

Leah en Lee Scott tree Maandag op

Leah en Lee, wat a.g.v. ongesteldheid nie vroeër vanjaar kon optree nie, tree Maandagaand in ons skoolsaal op. Kaartjies kos R80 vir volwassenes en R50 vir leerders. Kom ondersteun gerus hierdie opkomende sterre in die Suid-Afrikaanse musiekwêreld!