Dassedagsê 04/05/18

Langenhoven Header web
4 Mei 2018
                      Dassedagsê

 


Matriekafskeid


Daar is eerskomende Dinsdagaand, 8 Mei, ‘n vergadering vir dié ouers (ouers van gr. 11-leerders) wat die matriekafskeid help reël. Dit vind om 18:00 in die personeelkamer plaas.


Matriekleerders wat die matriekafskeid wil bywoon, moes aan die einde van April reeds hulle kaartjies betaal het. Diegene wat dit nog nie gedoen het nie, het ‘n laaste geleentheid om ‘n kaartjie te bekom. Alle kaartjies MOET eerskomende Maandag betaal word.


 


Proewe


Daar is 38 dogters wat môre aan Eden-netbalproewe te Oudtshoorn deelneem. Ons glo hulle sal hulle  uitstekend van hulle taak kwyt.  Baie sterkte aan elkeen van hulle!


Daar is 15 van die O/16- en O/18-rugbyseuns wat hierdie naweek aan Eden-proewe deelneem. Ons wens hulle ook baie sterkte toe.


 


Sportdag


Die O/19C-, O/15C-, en O/14B-netbalspanne neem môre aan ‘n sportdag te Heidelberg deel. Elkeen van hulle het ‘n program ontvang. Ons vertrou dat dit vir hulle ‘n baie genotvolle ervaring sal wees!


 


Hokkie en netbal vs HS Oudtshoorn


Die skool se hokkie- en netbalspanne neem Dinsdag (8 Mei) tuis teen Hoërskool Oudtshoorn se spanne deel. Dit beloof om baie kompeterende en uitdagende wedstryde te wees. Die program is aangeheg. 


 


Jo Black se vertoning


Baie dankie vir die uitstekende reaksie op die Jo Black-vertoning. Al die uitsoekkaartjies (vertoning met ‘n ete ingesluit) is reeds verkoop. Daar is slegs kaartjies vir sitplekke op die gallery (teen R150pp) beskikbaar. Indien u nog die geleentheid wil bywoon, moet u onverwyld met die skool in aanraking kom. Ons benodig egter nog soutbeskuitjies. Indien daar nog enigiemand ‘n pakkie soutbeskuitjies (of twee!) wil skenk, stuur dit asb. saam met u kind skool toe. Baie dankie al diegene wat reeds skenkings gemaak het. Dit word opreg waardeer.


 


Montagu-sportdag


Die eerste sportdag, waarby al ons wintersportsoorte gelyk betrokke is, vind volgende naweek tuis plaas. Hoërskool Montagu gaan by ons besoek aflê. Die program sal egter eers volgende week beskikbaar wees.


 


Koekverkoping


Die matrieks hou eerskomende Maandag ‘n koekverkoping ten bate van die OOV. Ons versoek dat leerders ‘n geldjie saambring skool toe om die koekverkoping te ondersteun.


 


Aansoeke om identiteitsdokumente


Leerders wat al sestien geword het, en nog nie ‘n identiteitsdokument het nie, kan op Dinsdag (15 Mei) by die skool aansoek doen. Beamptes van Binnelandse sake sal op daardie dag die skool besoek om leerders by te staan met hulle aansoeke. Hierdie leerders moet egter dan in besit wees van twee ID-foto’s asook ‘n gesertifiseerde afskrif van die volgende dokumente: eie geboortesertifikaat en moeder se ID-dokument.


 


‘n Uitstaande prestasie van Marlé!


Marlé van Wyk, ‘n gr. 11-leerder, is gekies om die Protea-span vir fisies gestremde leerders te verteenwoordig. Sy sal in Desember aan ‘n internasionale byeenkoms in Botswana deelneem. Sy is ook gekies om die “gesig van Stargardt-lyers” te word. Sy verteenwoordig nie net die skool nie, maar gesiggestremdes in die hele Suid-Afrika – ons is baie trots op hierdie uitstekende Dassie!