Dassedagsê 31/08/18

mail

Langenhoven Header web

31 Augustus 2018

                      Dassedagsê

 

Matrieks skryf eksamen

Die matriekleerders het gister amptelik met die eksamen begin met RTT-prakties. Die hele graad het egter vanoggend Afrikaans geskryf. Ons vertrou dat die matrieks met alle erns vir elke vraestel sal voorberei.

 

Sportdinee

Die sportdinee vind vanjaar op Woensdag, 26 September, plaas. Kaartjies kos R150 per persoon. Indien u dit wil bywoon, kontak asb. die skool vir kaartjies. Indien daar enige ouers is wat ‘n trofee teen R200 wil borg, en u is nie deur iemand in verband daarmee genader nie, kontak gerus die skool.

 

Eisteddfod

Die skool wil baie graag erkenning gee aan die leerders wat aan die Ratem Eisteddfod deelgeneem het. Die leerders moet hulle verslae en sertifikate asb. vir mev. Beyers neem sodat die skool van elke leerder se prestasie kan weet. Baie geluk aan almal wat die moed gehad het om op te tree.

 

Koor

Baie geluk aan die skoolkoor wat Woensdagaand puik op die Eisteddfod gesing het. Hulle het 85% behaal. Baie geluk ook aan mev. Erika Goedhals, die afrigter, en baie dankie vir al die ure se moeite met ons leerders.

 

Oueraand: gr. 9

Die gr. 9’s se ouers word uitgenooi na ‘n oueraand op Donderdagaand, 6 September, om 18:00. Die verrigtinge sal in die Ondersteunersklubhuis wees omdat die saal vir die matrieks se eksamen ingerig is. Dit is ‘n baie belangrike oueraand met vakkeuses vir 2019 in gedagte. Die ouers sal waardevolle inligting in hierdie verband ontvang.

 

Toetsreeks begin volgende week

Die matrieks het reeds met hulle eksamen begin, maar die leerders in al die ander grade begin volgende week met ‘n toetsreeks. Die toetse word aan die begin van die dag geskryf en klasse gaan normaalweg voort daarna. Leerders kan nie na die aflê van toetse huis toe gaan nie. Daar is ook GEEN blokdae nie.

 

Krieket en atletiek neem ‘n aanvang

Die krieket en atletiek het hierdie week al begin en die tennis sal volgende week begin oefen. Die krieket speel reeds volgende naweek twee T20-wedstryde. Moedig asb. u kind aan om by buitemuurse aktiwiteite betrokke te raak.

 

 

 

 

--

HS Langenhoven geborg deur RIVERSDAL TOYOTA          

--

If you're not interested any more » unsubscribe