Dassedagsê 20/01

 

mail

Langenhoven Header web

20 Januarie 2017

                      Dassedagsê

 

 

Atletiek

 

Die jaarlikse kleure-atletiek het gisteraand plaasgevind. Baie geluk aan die geelspan wat die botoon gevoer het. Daar sal later meer breedvoerige inligting oor die individuele prestasies deurgegee word, maar van die beste prestasies van die byeenkoms was: Richard Marshall, vanjaar se hoofseun, het die rekords in beide die diskus- en spiesgooi-items vir seuns O/19 verbeter. Lazlo Paulsen het ook twee rekords verbeter, nl. in die 1500m en 800m vir seuns O/15. Die hoogste punt op ASA se tabel is deur Elzé van Tonder behaal met 850 punte vir gewigstoot vir dogters O/19. Sy het ook die diskus-item gewen. Baie geluk aan bogenoemde atlete en alle ander atlete wat mooi presteer het. Dankie ook aan mev. Elmari Vosloo en al die ander lede van die OOV wat verseker het dat leerders nie van honger en dors omgekom het nie!

 

 

 

Matriekuitslae 2016

 

Die skool se matrieks het weer puik presteer. Die skool het, nadat verlede week se nuusbrief gedruk is, verdere goeie nuus ontvang. Sanja Steenekamp is derde op die WKOD-merietelys vir Siviele Tegnologie. Roché Saayman (6de) en Karli Breytenbach (9de) het die WKOD-merietelys vir Verbruikerstudies gehaal. Afrikaans Huistaal se uitslae was ook uitstekend en het, as vak, die 19de plek in die Wes-Kaap ingeneem.

 

 

 

Dankie!

 

Baie dankie vir elkeen wat water vir die brandbestryders geskenk het. Ons het groot waardering vir die waardevolle werk wat die brandbestryders, onder moeilike omstandighede, in ons gemeenskap verrig.

 

 

 

Krieket

 

Die eerste krieketspan speel eerskomende Maandag hulle eerste wedstryd van die jaar. Hulle speel teen Hoërskool Oudtshoorn op Oudtshoorn. Hulle vertrek reeds om 12:00 vanaf die skool.

 

 

 

Golf

 

Die skool se gholfspan speel Maandag ook hulle eerste wedstryde van die jaar wanneer hulle in die skole-kompetisie op Mosselbaai afslaan.

 

 

 

Tennis

 

Twee gr. 8-leerders, Magdel Barnard en Christel Jooste, neem vanmiddag en môre aan Eden-tennisproewe te George deel. Baie sterkte aan hulle!

 

 

 

Nuwe Dasse-pette

 

Die nuut-ontwerpte Dasse-pette is te koop by die skool. Hulle kos R70 elk. Leerders kan dit vir sport gebruik, maar ouers is welkom om dit ook aan te skaf en te dra!

 

 

 

Twee GROOT mylpale

 

Die skool bereik vanjaar twee groot mylpale. Eerstens, Hoërskool Langenhoven is in 1942 gestig. Die skool is dus vanjaar 75 jaar oud. Groot feesvieringe vind vanjaar plaas!

 

Tweedens, daar is vanjaar 455 leerders in die skool, by verre die meeste leerders ooit. Daar is, onder andere, presies 100 gr. 8-leerders. Ons vertrou dat elke kind vanjaar, soos in die verlede, baie gelukkig in Hoërskool Langenhoven sal wees.

 

Koerante

 

Met die oog op ‘n interne debatskompetisie vra ons ouers asseblief om Saterdag 21 en 28 Januarie se volledige Burgers, die daaropvolgende Maandae na die skool te stuur.

 

 

Hoërskool Langenhoven – 75 jaar oud!

 

--

HS Langenhoven geborg deur RIVERSDAL TOYOTA          

--