Dassedagsê 26/04/17

 
mail
Langenhoven Header web
26 April 2017
                      Dassedagsê

 

Netbal en hokkie vs HS Oudtshoorn

 

Die skool se netbal- en hokkiespanne speel Dinsdag, net na die langnaweek, teen Hoërskool Oudtshoorn op Oudtshoorn. Die busse moet reeds om 11:00 vertrek sodat hulle om 14:30 kan begin speel.

 

 

 

Rugby weer in aksie

 

Die skool se eerste- en O/15-rugbyspanne het gister tuis teen Kairos gespeel. Die O/15’s het ongelukkig verloor, maar die eerstespan het met 25-5 gewen. Die rugby speel ook Dinsdag, teen Kannaland. Die wedstryde word tuis gespeel.

 

 

 

Hokkiedogters presteer                      

 

Die volgende dogters is in Edenspanne opgeneem na afloop van die afgelope Maandag se proewe: Andrea de Waal, Zanelle Warner, Andrie Swart en Danielle de Beer. Baie geluk aan hierdie dogters!

 

 

 

Hokkietoernooi in Mei

 

Die skool se hokkiedogters speel volgende Vrydag en Saterdag (5 en 6 Mei) in ‘n toernooi teen Hoërskool Punt en Hoërskool Sentraal op Mosselbaai. Ons glo dat ons dogters, soos gewoonlik, net hulle beste sal lewer. ‘n Program sal volgende week beskikbaar wees.

 

 

 

Netbalproewe

 

Daar is ‘n groot getal netbalspelers wat volgende Vrydag en Saterdag aan Eden-proewe deelneem. Die tye is nog nie gefinaliseer nie, maar dit sal waarskynlik ‘n lang en uitmergelende naweek vir hierdie dogters wees. Ons wens hulle alle sterkte toe.

 

 

 

Bywoning van sportdae

 

Leerders wat nie aan sport deelneem nie, maar met sportwedstryde hulle mede-Dasse kom ondersteun, woon sulke geleenthede in VOLLEDIGE SKOOLDRAG by. Daar sal voortaan streng teen leerders, wat nie korrek geklee is nie, opgetree word.

 

 

 

Moedersdag

 

Die ma’s mag eintlik nie hierdie beriggie lees nie! Die Pa’s en kinders moet onthou dat Moedersdag op 14 Mei is. Daar is aan die leerders ‘n pamflet gegee waarop verskeie Annique-produkte spesiaal vir Moedersdag geadverteer word. Indien u die ma van die huis wil bederf, moet die geld en bestellingsvorm teen Woensdag, 3 Mei, by die skool ingehandig word.

 

 

 

Skoolfees: 75 Jaar

 

Die skoolfees vind vanaf 29 Junie tot 2 Julie plaas. Maak asb. ‘n aantekening van die datums. Daar sal beslis vir elkeen iets besonders wees om aan deel te neem. Op Donderdagaand, 29 Junie, sal daar byvoorbeeld ‘n vertoning vir die leerders (en jonges van gees!) van die sanger Snotkop wees. Agterop hierdie nuusbrief is daar ‘n voorlopige program van fees. Nadere besonderhede sal spoedig aan u deurgegee word.

 

 

 

Vervoergeld

 

Daar is verlede week kennis gegee van die Beheerliggaam se besluit rakende vervoergeld. Ons herinner dat die reëling is: R200 vir ‘n “seisoenkaartjie” of R50 per busrit. Dit geld vir sportwedstryde asook vir kultuurbedrywighede. Die leerders kan die kaartjies by mev. Coetzer koop. Indien u enige vrae hieroor het, kontak asb. die skool.

 

--

HS Langenhoven geborg deur RIVERSDAL TOYOTA          

--