Dassedagsê 02/02

 

mail

 

Langenhoven Header web

 

 

2 Februarie 2018

 

                      Dassedagsê

 

Beheerliggaamverkiesing

Dit is weer beheerliggaamverkiesingtyd in Suid-Afrikaanse staatskole. Ons beheerliggaamverkiesing vind op 5 Maart plaas. ‘n Registrasievorm word vandag saam met u kind huis toe gestuur. Twee ouers (of persone wat as ouers optree – sien registrasievorm nadere besonderhede) per leerder mag registreer vir die verkiesing. Vul asb. die vorm in en stuur dit so spoedig moontlik aan die skool terug.

 

Uitstekende atletiekprestasies

Ses rekords is met die kleure-atletiek verbeter. Lyle-Clint Fielies het selfs twee verbeter, nl. 100m en 400m vir seuns O/14. Ander atlete wat die rekords laat tuimel het, is Reevin February (hoogspring, seuns O/17); Jamain Hendricks (verspring, seuns O/17); Sarise Oosthuizen (spiesgooi, dogters O/14) en Stephan Prinsloo (diskus, seuns O/17). Stephan het die ou rekord met meer as drie meter verbeter. Hy is boonop die Senior Victor Ludorum. Die Senior Victrix Ludorum is Alika Steyn, die Junior Victor Ludorum is Lyle-Clint Fielies en die Junior Victrix Ludorum is Anneke Charles. ‘n Ander merkwaardige prestasie is dat 345 leerders vir die byeenkoms ingeskryf het, ongeveer 75% van die skool. Verskeie ander leerders het boonop as beamptes of helpers opgetree – beslis ‘n pluimpie vir die Dasse!

 

Twee fikse Dasse presteer!

Andrie Swart en Marlé van Wyk het verlede week, met die tweekampproewe te Oudtshoorn, hulle provinsiale kleure in hierdie uitmergelende sportsoort verwerf. Baie geluk aan hierdie twee fikse Dasse!

 

Swemafrigting begin!

Daar is in die onlangse verlede verskeie versoeke vir die aanbied van swem as ‘n sportsoort by die skool. Een van die uitdagings was om ‘n afrigter te kry. Me. Malandi Oosthuizen, die Wiskunde-onderwyseres wat vanjaar by ons aangesluit het, sal ons swemmers afrig. Die eerste swemoefening vind eerskomende Maandag om 16:00 in die dorp se swembad plaas. Oefeninge sal elke Maandag en Woensdag van 16:00 tot 17:30 wees.

 

ADD/ADHD

ADD en ADHD is deesdae baie in die nuus. Daar is baie mites aangaande die redes en behandeling hiervan. Indien u meer hieroor wil weet, bestudeer asb. die advertensie agterop hierdie nuusbrief.

 

Transcape-fietstoer

Die jaarlikse Transcape-fietstoer doen Dinsdag weer by ons aan. Hulle eindig die dag se skof op ons sportvelde. Die eerste fietsryers behoort al vanaf 10:00 daardie oggend aan te kom. Kom kyk en ondersteun gerus!

 

Lee en Leah

Twee opkomende sangers, Lee en Leah, tree eerskomende Woensdagaand om 19:00 in ons skoolsaal op. Kaartjies kos R80 vir volwassenes en R50 vir leerders. Kom geniet gerus hierdie twee talentvolle mense se musiek.

 

Beroepsvoorligting aan grade 11- en 12-leerders

Me. Sinmarie Pieterse, ‘n opvoedkundige sielkundige, is bereid om na die skool te kom en volledige psigometriese toetse op ons leerders te doen. Individuele terugvoering word gegee asook ‘n inligtingpakket oor toepaslike kursusse en moontlike beroepskeuses. Dit kos R1 980 per leerder. Belangstellendes kan ‘n vorm by mev. Beyers afhaal, invul en terugstuur.

 

Koshuis se jaarlikse kenmekaar

Die koshuis hou op 12 Februarie ‘n kenmekaar vir alle ouers van koshuisleerders. Dit is ‘n geleentheid om heerlik saam te eet en saam met ander ouers te kuier RSVP by me. Marianne Streicher (0824413026) teen 7 Februarie.

 

 

 

 

 

 

 

 

 

 

--

 

HS Langenhoven geborg deur RIVERSDAL TOYOTA          

 

--