mail
Langenhoven Header web
26 April 2018
                      Dassedagsê

Baie sterkte, Christel!

Christel Jooste het vanoggend Johannesburg toe gevlieg. Sy neem hierdie naweek aan die Interprovinsiale Tennistoernooi in Pretoria deel. Sy verteenwoordig Eden O/15-dogters by hierdie toernooi. Ons wens haar alle sterkte toe!

 

ATKV-debatskompetisie

Die streeksuitdunrondte van die ATKV se debatskompetisie, wat verlede naweek in ons skoolgebou plaasgevind het, het baie goed afgeloop. Ons leerders het hulle baie goed van hulle taak gekwyt. Die leerders wat as beamptes opgetree het, was ook ware ambassadeurs vir ons skool. Baie dankie aan ieder en elk wat ‘n bydrae gelewer het om van die dag ‘n groot sukses te maak. Ons het gister van die ATKV se hoofkantoor verneem dat twee van ons junior spanne na die semi-finale rondte deurgedring het asook een van die senior spanne. Baie geluk aan al hierdie leerders! Hulle neem tydens die eerste naweek in Junie op George teen die Oos-Kaap se spanne deel.

 

Hokkieproewe

Die O/18-dogters neem eerskomende Maandag (30 April) aan finale SWD-hokkieproewe deel. Die O/14-seuns en –dogters neem Dinsdag (1 Mei) op George deel. Baie sterkte aan al hierdie hokkiespelers.

 

‘n Goeie wen vir ons rugbyseuns

Die skool se rugbyspanne het Dinsdagmiddag teen Kairos op Heidelberg gespeel. Al drie spanne wat in aksie was het gewen. Die O/19A’s het met 15-10 gewen, die O/16’s met 14-0 en die O/15’s met 15-14. Baie geluk aan ons seuns wat hulle onder moeilike omstandighede goed van hulle taak gekwyt het.

 

Jo Black optrede

Ons herinner aan die Jo Black-optrede van 11 Mei. Ons benodig steeds soutbeskuitjies. Dus, as u ‘n pakkie kan skenk, stuur dit asb. skool toe. Dankie aan diegene wat reeds skenkings gemaak het. As u kaartjies wil koop, kontak gerus die skool. Dit kos R150 per persoon om gallery-kaartjies te bekom en R250 sal vir u ‘n kaartjie met ‘n driegangmaaltyd besorg. Jo Black is een van die land se groot sangsterre, en hy is op ons eie agterstoep – moenie hierdie geleentheid misloop nie!

 

Matriekafskeidvergadering

Daar is ‘n vergadering vir ouers van gr. 11-leerders wie se kinders by die aanbied van vanjaar se matriekafskeid betrokke is. Dit vind op Dinsdag 8 Mei om 18:00 in die personeelkamer plaas.

 

Eisteddfod

Dit kos R25 vir leerders om aan vanjaar se Eisteddfod deel te neem. Leerders moet hulle van die kategorievoorskrifte vergewis VOORDAT hulle inskryf. Alle inskrywings moet vergesel word van ‘n afskrif van die stuk wat gelewer gaan word. Die sluitingsdatum vir inskrywings is 8 Junie.

 

Loopbaanuitstalling

Daar is op 2 en 3 Mei ‘n loopbaanuitstalling in ons skoolsaal. Baie van die tersiêre instansies sal teenwoordig wees. Op 2 Mei is die uitstallers van 18:00 tot 19:30 beskikbaar en op 3 Mei van 08:30 tot 10:00. Dit is ‘n ideale geleentheid vir leerders en hulle ouers om inligting oor moontlike beroepe te bekom. Woon dit dus gerus saam met u kind by.

--

HS Langenhoven geborg deur RIVERSDAL TOYOTA          

--